പിറവികളെല്ലാം തിരുപ്പിറവികളാകുന്നു -
പലായനങ്ങളുടെ അന്ത്യം!
പീറവികള്‍ അനിവാര്യമായ
ആഘോഷങ്ങളുടെ നഗരപ്രവേശങ്ങളിലേക്ക്
നീങ്ങുന്നതിന്റെ ശേഷം
അതിമോഹങ്ങളുടെ മുപ്പതുവെള്ളിക്കായി
ഒരു കപടചുംബനത്താല്‍ ഒറ്റിക്കൊടുക്കപ്പെടുകയും
ശേഷം- നീതിമാന്‍ കൈകഴുകുകയും ചെയ്യും..
നവനിയമങ്ങളുടെ മുള്‍ക്കിരീടം ധരിപ്പിച്ച്
ഭരണകൂടം വിധിച്ച കുരിശുംതാങ്ങി
അധികാരോന്മാദത്തിന്റെ
മലയിലേക്ക് നടത്തപ്പെടും..
അവിടെ -
ഇടവും വലവും കള്ളന്മാരോടൊപ്പം
പീഢനാനന്തരം കുരിശുമരണവും!
എല്ലാ തിരുപ്പിറവികളും നീളുന്നത്
പീഢനങ്ങളിലേക്കും കുരിശു മരണങ്ങളിലേക്കുമാണ്!
ശേഷം ഒരു ഉയിര്‍പ്പിന്റെ പ്രതീക്ഷയിലേക്കും!
